Email
Thu leh Hla
‘HE ISUA AN TIH HI ENGTIN NGE KAN TIH ANG?’
Kum 2000 dawnlai a liam ta. AD. 31 khan Pilata rorelna pindanah mipakhat sualna reng nei lo chu thi tura a chungthu rel turin an hruai a; Pilata lu a ti hai ngei mai, sualna reng a nei si lova. Chhuah zalen aduh a mahse mipui tih lawmloh a hlau avangin thil atthlak tak a ti ta. Sakhaw hruaitu mi zahawm tak tak, thuneihna leh thil tih theihna chak a tuihal, mahni hmasialna leh vervekna a khat te leh, an kaihhruai tur reng ni awm tak mipuite hnenah ngei mai chuan, “Judate lal (Isua) in tiha hi engtin nge ka tih tak ang le?” tiin a zawt a. Anni chuan diriam takin, “kross-a khengbet rawh, Kross-ah khengbet rawh,” an lo ti a. Chu mifel tak chu kross-ah an khenbeh ta a. A thi a, a ruang chu thlanah an zalha, lei kawrawng chhungah chawlhni a hmang a. Ni thumniah chuan thihna hnehin, ropuina nen a tho leh ta.
Kum tam vein, chhuan tam liam mahse, Pilata zawhna “He Judate lal (Isua Krista) an tih hi engtia tih tur nge? tih erawh chhuantinah a thangkhawk nawn ta zel a. Engtin nang leh kei hian he Isua hi kan tih ve dawn le?
1. Kan ti lawm tur a ni: Kan aia a nun hlan tu, kan sualte min ngaidam tu lawm zawnga awm hi mihringte tih tur chu a ni mai. Pathian duh zawng chu thinlung lungchhia leh inchhir ngawih ngawih kan ni tur a ni. A thupek 10-te hi chhunhan pakhat te mah hmaih lovin kan zawm famkim tur a ni. Kan tan Anun A bunruak vek angin Atan kan nun kan bunruak ve vek tur a ni. A tan channa nun kan huam ve tur a ni, kan neih zawng zawng leh kan nunna hial pawh kan chan ngam tur a ni, kan hmangaihber te channa hial pawh. Ani chuan kross kawng a lo zawh hmasa tawh a, keini pawhin a hniakhnung zuiin mahni hrehawm pawisa lovin kan kross kawng hi kan zawh ve tur a ni, rit deuh mahse kan ti tang tang tur a ni. Kan taksa te hi ti thianghlim reng in, inthawina nun, halral thilhlanah kan hlan tur a ni.
MAHSE a va har tak em!
Thinlung lungchhia leh inchhir ngawih ngawih put reng hi kan thei thin lo. Vawitam tak chu keimahnia Pathian thiltihtheihna tlem lolang thlirin, min tihtirtu Pathian hlamchhiahin, kan theih tak emaw tiin kan lo chapo ve thin. Hlimnate kan tawn changing thinlung lungchhia leh inchhir ngawih ngawihna hi kan lo thlahtlam leh mai thin. Thinlung lungchhia neih kawngah hian Pathian lung kan ti awi zovin a hriat loh.
A thupek 10 te hi kan ngaina a, thupek 4-na (Sabbath) pawh kan duh em em, mahse kan thinlung hian Pathian aia thlan zawk a nei fo thin; rosum leh thuneihna lemte rawng kan bawl bawk thin. Kan Pathian hmingte hi duhdah takin tawngtainaah te kan lo lam mai mai fova; nu leh pa chawimawi kawngah phei chuan chhuan tur nei kan tlem khawp mai. Kan mihringpui tumah kan la that lo ani maithei, mahse an chhaw/mawl te chu kan ti fo thin, huat pawh kan nei thin; Isua chuan unaute chhaw/mawl tih leh huat te hi tualthat tluk a ni a ti; kan tih lawm tum ber Isua lawmloh zawng a ni tlat mai.
Kan taksa hian hringhranin uirena sual dai lo mahse rilru erawh a uire thei hle bawk si. Khawvel thilte alangin ru lo mah ila mi chanai leh midikna te, mi hunte kan ruk sak thei, pulpit tlang atang pawhin mi hun hlutak kan ruk sak thei tlat. Hretu derah te tang lovin, vengte thil awt em em lo mah ila, Pathian ti lawmkhawp chuan kan nunpui ngut a ngem tih hi zawhna lian tak a ni. Sabbath, thupek palina kan serh ve a, mi aiia kan hriat dik avangin kan intithei fu thin, mahse Pathianin Sabbath serh a tihawmzia kan la ngaihtuah ngai lo a nih chuan, chawlhni a kan thawmhnaw neih that inbela biak ina kal ve ngawt hian Pathian a lawm reng reng lo tih erawh kan theihnghilh tur a ni lo.
Neih zawng zawng, ENGKIM channa nun nunchhuahpui thei kan vang viau lo maw! Kross kawng kha Isuan kan ai a lo zawh si a, he mi kawngah kher hi chuan tumahin kan zui theiin a rinawm loh. Pathian Beram No meuh pawhin zawhawl a ti lo hle si a. Tlan ngai, chakna reng nei lo hringfate zingah channa nun leh Kross kawng zawh a Pathian lungtiawi/tilawm thei tur an awmin a lang lo. Mifel ber felna pawh Pathian tan chuan pawnchhia, silfen bawlhhlawh ang chauh a ni bawk si a, mihring theihna zawng zawng pawhin Pa lungawina a thlen thei lo.
Halral thilhlana hman tlak mihring nungchang thianghlim famkim, Isua Krista tih loh chu, tumah an awm lo, pakhat te mah an awm lo. Mihring thiltih engmah hian Pathian a tilungawi thei lo. He Isua hi, mihring thiltih engmahin a tilawm thei tak tak lo a nih chu.
Kan thil tihin a tihlawm zawh si loh chuan, he Judate lal, Isua an tih hi, engtinnge kan tih tak ang?
2. Isua hi chatuan nunna tui, kan in tur a ni: Samari hmeichhia hnenah Isuan, “He tui (Amah a insawina a ni) in apiang an tuihal leh tawh lovang,” a ti. Samari hmeichhia khan chu Tui chu a in a, a sual zawng zawng a tlengfai a, chatuanin a nung dawn a ni. He tui hi i in ve taw hem? Tuihal apiang lo kal ula, a thlawnin in rawh u, aman pe lovin in duh zat zat in rawh u a ti. Isua hi chatuan nunna tui, chatuana kan dam nana kan in tur a ni. Mahse engtinnge He Isua hi kan in theih ang?
3. Isua hi chatuan nunna chhang, kan ei tur a ni: Isuan, “Kei hi chhang nung, van atanga lo chhuk ka ni, ka taksa in ei a, ka thisen in in bawk chuan ka hnenah chan in nei ang,” a ti. He nunna chhang hi i lo ei ve tawh em?
4. Isua hi hmangaih a, inlaichinna neihpui chi a ni: Keimahah awm reng rawh u, keimah lovin nunna nei hek lo che u, ati. Pengin a hruipui a zawma, a nunga, a rah thin ang hian, Isua chuan amah zawma, nunga, rah turin min ti.
1999 vel khan Pizza hi TV-ah an fak ka hmu ve zauh zauh tawh thin a, a live erawh chuan ka la tawng lo. Spicer College Hostel-a kan awm hma kuma thil thleng niin ka hria, Mizo zirlai zinga mi thenkhat Bombay-ah an kala, Pizza an ei a, tui an ti viau ni tur a ni, hostel-a an haw leh chuan an thian pakhat chu Pizza an ei chungchang an hrilh a. Rs. 120/- man lai a nia an ti a. An thianpa chuan a ngaihtuah vang vang a, “E! A man a to bawka a thlum tui ngawt ang!” a ti e, an ti.
Han ngaihtuah let chuan thil nuih zathlak chu a ni ve ta mai a. Mahse Pizza hrelo, thlum ngaina mi tan chuan, Rs. 120/- man lai a to thil ei tur chu a thlum tui hmel ngei ngei ang. Mahse Rs. 120/- laia to anih avang ngawt hian thil eitur tinreng hi a lo thlum vek hauh lo mai a. Pizza pawh a thlum miah lo na a, tui tak a ni.
“Drums of Heaven” i duh em? Vuak a nawm duh hmel i ti em? Zai a chawi duh hmel i ti em? Mahse zaipui chi a ni lo, ti ta i la, i rilru a buai viau lawng maw? Eng atan nge i tih ang? “Drums of Heaven” i hriat miau loh chuan, vuak tur nge ben tur, ei tur nge in tur, tarmawi chi nge a chunga chuan chi pawh i hre lovanga, tih vak ngaihna i hriat pawh ka ring lo.
A then chuan ‘thi awm reng a ni’ an ti a, an khengbet nawn fo va. A then chuan tihngaihna reng an hre lo. Anih leh keini Adventist-te hian ‘he Isua an tih hi engtin nge kan tih ang?” Thi awm reng a ni, tiin kross-a khenbeh chu kan duh hauh lovanga, mahse tih vak ngaihna erawh kan hre lo mai thei.
Thuhriltute zarah he Isua an tih hi ka lo ral hriat ve tawh thin a, min hmangaih zia te leh ka sual a ngaihdam ziate nen. “Thi awm reng ani” ka ti thei lo va, chutianga tih ka tan a mawi lul lo a ni. Min hmangaihna vanga ka tana a tawrh zia te min hrilh chang phei chuan, ka khawngaih em em thin a, ka mittui pawh dan rual lohvin vawi tam tak a lo sur ve tawh thin nghe nghe a. Kross-ah khengbet rawh titute kha an demawm hle in ka hria. Kross-ah khenbeh chu duh lo mah ila engtia tih tur nge tih erawh chu ka hre thiam lo.
Ka buaina chhan ber chu ka ti lawm ve zo lo hi a ni. Tih lawm ka duh, ka zep lo, ka tana a nun hlan tuin ka laka a thil phut hi a awm ka ti lutuk, ka vui lo, ka vui miah lo. Mahse a thil phut ka tih hlawhtlin sak thei miahlo mai hi a ni pawi ka tih ber ni. Khati khawpa min hmangaihtu in ka tana tuara, min hmangaihzia a tih lan hnu pawh a, ka laka a phut ve ka tih hlawhtlin sak theih loh avang hian ka in dem a, ka zak a, hrem pawh phu ka inti. Hrem zia reng ka ni. Mahse ka tlaktlai loh vanga ka tan liau liauva a siam Vanramah ka kal thei lo tur erawh hi chuan ka rilru hi a ti hah ngawih ngawih thin. Thlarau Thianghlim ruah hnuhnung dawngten Isua an tih lawm nasat tur zia ka ngaihtuah chang phei chuan, ka chak lohna avanga ka dawng ve thei lo tur hian min tilungngai a, ka in ten hluah hluah thin.
| There are 0 comments to this post |
