VODAFONE MFA LEAGUE - CHIRH DIAK ZINGAH AN KHU LUAI LUAI

Ni 18 July, 2009 (Inrinni)-a Dinthar FC leh RC FC, Leitan-te inkhelah buaina a chhuak a, inkhel tihtawp ngai hial khawpin an buaina a punlun hman a ni. Buaina chhuah lai hian Dinthar FC chuan 4-2 in hma an hruai mek.

Dinthar leh RC FC inkhel hi a tir atangin boruak atanga nghal at mai a. Attacking football an khelh ve ve avangin an buai thleng hian inkhel a hmuhnawm tluan chhuak zak a ni.  Dinthar hian hma an hruai hmasa a, RC lamin an sut a, Dinthar-in vawihnih an thun leh a, RC-in goal khat an sut leh a, 3-2 a ni. Dinthar-in goal lina an thun a, 4-2 a ni chiah a, he goal luhdan ah hian RC lam an lungawi lo a, an buai ta luai luai mai a ni.

VODAFONE MFA LEAGUE 2009-AH LUANGMUAL SANG ZUAL ZEL

Sum leh tha tam tak an sen hnuah hlawhtlina hmel an hmu thei lo a, veng tam tak ni se Luangmual FC hi a ding tawh lo ang. Nimahsela an beidawng duh lo a, tunah chuan MFA League hmahruaitu an ni - vawi li khelhah point 10 an hmu ta - College veng FC 5-0 in an sawp bawk.

Nimin chawhnua AR Lammuala inkhelah College Veng-in Player pakhat an chan a, hei hi a tawp thlengin an tuar tluan chhuak ta a, Luangmual lamin goal an thun teuh bakah goal tam zawk thun thei turin chance an ngah a ni.

PLAYER INSAWIFIAHNA MFA IN CHHANG

Mizoram Football Association chuan thuchhuah siamin, kumina National ootball Championship vawi 63-na Tamil Nadu-a khelh zawh taka I-League club-a khel Mizo player thenkhatten Mizoram tana an khelh loh chhan media thenkhata tarlan sawifiahna chu a chhang a; Mizoram state pawna Mizo player-te chu anmahni be hmasa phawt lo chuan official takin an sawm nghal ngai lo, tih an sawi.

MFA chuan, player thenkhatin MFA phalnaa kal lo an nih thu leh, official-a sawm an nih loh thu an sawi chu chhangin, "State pawn player-te reng reng anmahni be hmasa phawt lo chuan officialin kan sawm ngai lo a, biak an nih hnuaah an remchan dawn a, an club emaw, an khelhna state FA-ah emaw dilsak an ngai a nih chuan official-a kohna hi a siam chauh thin," an ti.

LAMMUALA STADIUM SAK TUM MUALPUIA SAWN CHHAN SAWIFIAH:

Sorkar hmasain an term tawp lam a, ARLammuala Rajiv Gandhi Stadium din tuma lungphum an phun vek tawh chu ruahmanna a fel tawk lo a, gallery kil khat siamna chauh a nih vang leh phalna pawh an lak loh avangin Mualpuiah stadium puitling sak tuma nih tak zawk thu Sports & Youth SErvices Minister Zodintluanga (Mama) chuan a sawi.

Minister Zodintluanga chuan nimin khan IPR Auditoriumah chanchin bu mite kawmin thil awmdan a sawifiah a,Minister sawi dan chuan Rajiv Gandhi Stadium sakna tur hian 12th Finance Comission khan vaibelchhe 25 a rawn pe a,he pawisa hi kumthar March thlaa hman zawh tur a ni a,State sorkarin vaibelchhe 2 a tum ve tur a awm.MNF sorkar khan he pawisa hmang hian stadium din tum angin a in sawi a,nimahsela an ruahmanna ang chuan tuna Lammualah hian mipui thutna thler khat chauh siam tura hmalak a nia, hetih lai hian Lammuala stadium din tura phalna a lo awm bawk si lo a, Mualpuia 3rd Bn MAP ramah sawnin hma lak mek ani.

Santosh trophy-ah Mizoram tlawm Mizo player langsarte’n an chipuite tan khel duh lo !!

National football championship for the Santosh Trophy vawi 63-na khelh mekah  Mizoram chu pre-quarter-final-a an khingpui Goa lakah sithum faiin an tlawm a, National Games khel pha tura ramri kham thlen ngai quarter-final rap zo loin an tla ta a ni.

All India Football Federation hnuaia state hrang hrangte inelna sang ber Santosh Trophy-ah hian Mizoram hi an la chetha thei tak tak ngai lo a, kumin hian an thlensan ber hun tawngin pre-quarter final hial an thleng a, mahse, vawi li champion tawh leh vawi sarih zet runners up lo ni tawh Goa paltlang tur meuh chuan an la tha tawk lo a, nimin khan sithum faia tlawmin, second half tan hnu lawka Tezawka hnawhchhuah a ni kha an tuar a tih theih bawk ang. Mizoram hian first half-ah sikhat an phur zet a, second half-ah rilru thar leh tha thara nawr an tum laiin an midfielder pawimawh an hloh a, goal hnih an phurh belh leh ta zawk a ni.

Khaw’nge thian chhan thih ngam Mizote kha ?!
Tuntum Santosh Trophy khel tur hian Mizoram Football Association lam chuan Mizote’n footballer kan neih that ber ber hruai ngei an tum a, mahse, Mizoram tana khel tura an sawm thenkhatin chhuanlam an siam a, player 18 chiah nei chungin Goa an pan ta hial a, assistant manager Danny-a chu player anga ziahluh a nih phah hial bawk.

Mizoram hian National Games-ah football an la khel pha lo hrim hrim a, heta khel tur hian Santosh Trophy hi a pawimawh hle a, quarter-final tal thlen phak loh chuan National Games-ah football khelh theih a ni lo. Hetiang taka tournament pawimawh a nih avang hian MFA lam pawhin theihtawp an chhuah a, mahse, player lamin ‘Kan sakruang Mizoram tan’ an ti lo deuh nia a lan avangin tihngaihna a vang hle…

Chanchinthar.Com Comment:

He thil chungchangah hian thil sawifiah ngai deuh awmin a lang. Chanchinbu lam ten hetianga kan inkhel mite rilru chawk tho zawng ni lo. A thangchhe zawnga inchhuah hi a dik ber em tih hi kan ngaihtuah a ngai. Player inkhel duh lo a rawn tihte hi uluk takin an bel chiang em? Mama chanchin chu kan hre chiang chiah lo a. Eng ngemaw harsatna chu a nei ngeiin a rinawm. Robert-a chungchangah  chuan a pa thih ngamin a na a. Eng hunah pawh chat thla thut thei a ni. An chhungkua-ah Robert-a hi an vauchher ber a ni a. Ram tana a thawh a tul laiin thihna nena in ngheng reng a Pa a ngaihsak a tul ve tih kan hriat a. Ar chuk tui lo khawp a kan chhuah hi a tul ber lem lo.

Tuaitea chungchang hi han en ve leh i la. Media hrang hrang leh Internet lamah te a chanchin kan hria. A nunkawng a zawh pelh avangin harsatna a tawk a.  Rehab-ah a club khelhna ten an dah lut hial a ni. Kawng rem rap leh turin hma a la mek a. Tin, Mizoram hian Santosh Trophy khel turin an sawm lo hrim hrim niin a lang bawk.  West Bengal-in Santosh Trophy final an luh hnu-a an interview-ah chuan heti hian Tuaitean a sawi, "I was not even asked to play for Mizoram this year, which I would have loved to,". 

Mizoram hian kan player-te hi harsatna an tawh chungchangah an ngaihsak tawk lo a ni mai lo maw. Rilru leh thlarau lam thlenga harsatna an tawh laiin theihtawpa tawiawm chu an tihtur a ni ve dawn lawm ni. An chak that lai leh an hun tha neih lai chauha ngaihsak vut loin, harsatna an tawh hunah pawh ngaihsak hi an phu a ni.  Chanchinbu lam pawh hian thu kan uar dan hi chin tawk neih a tha a. Player-te harsatna tawp va hriatpui mang si lova, ar pan chuk tui lo khawpa lo tihkual vel hi a tul ber lem lo a ni.  Player-te pawhin rilru hrehawm takin an hun an hmang ngei ang tih a hriat a. An khel thei lo chu hrehawm pawh an ti ve ngei ang.  Khel duh ngawih ngawih khel thei lo an ni tihte pawh hriat sak tel ve ila.

June 02 Evening Post daiha chhuak tawh mah ni se,  Sawi ve tula kan hriat avangin kan han thar thawh leh a ni e.

63rd Santosh Trophy, Pre-quarter final-ah Mizoram kan chak zo ta lo

63rd Santosh Trophy Tamil Nadu-a khelh mek-ah Mizoram chuan Goa Goal -3 -a hneh lovin Pre-quarter final-ah an tla fel ta.

Mizoram hian kumin hi Santosh Trophy awmtirh ata Pre-quarter final kan thlen vawikhatna a ni a.  Kan player-te an chhuanawmin beih pawh an bei nasa a, Nimahsela Football Power House Goa chu kan hneh ta ngang lo a ni. Engpawhnise, Kan player te kan chhuangin kan ngaisanga, nakum lamah chuan hei aia sang kan thleng tawh ngei ang.

Mizo zinga Mt. Everest lawnchhuak hmasa ber

Mizo tlangval Capt. Samuel Lalrintluanga (Indian Army), Nehru Institute of Mountaineering, Uttarkasi, Uttaranchal State-a Medical Office-a thawk lei chu Nehru Institute of Mountaineering leh Indian Montaineering Foundation (IMF) te ruahmanna Mt. Everest Joint Expedition-ah team leader niin May 21, 2009 khan an lawnchhuak a, tunah hian Base Camp pahnihah an kir thla leh mek a, Dr. Capt. Samuel Lalrintluanga hi Mizo zinga Mt. Everest lawnchhuak hmasa ber a ni.

Khuma hmaah Giant Killer in awmzia a nei lo

Mumbai khawpuia All India National Series Tennis Tournament-ah Delhi rawlthar Shashank Noutiyal a che tha hle a, Noutiyal hian beisei loh takin player tha pui pui a hneh nawlh nawlh a, giant-iller ti hiala koh ni mahse, Mizo naupang, Delhi lama awmhmun khuar rih Basil Khuma lakah chuan Noutiyal hian eng a ang zo ta lo a, boys under 14 title inchuhna match-ah Khuma hian 6-2 6-2 in Andheri venga Practennis Court-ah Inrinni khan hnehna a chang

LPS Pro-Fight vangin Boxing Glove hralh kal

"Mipa leh mipa chu inngur chher mai tur.. Ngan leh ngan, khal leh khal, ka rin leh ka rin.." tih hla chu tunlai hla lar a ni a, 'mipa leh mipa inngur chher chher' chu tunlai titi a ni. Titi mai a tawp lo, naupang tam takin 'mipa leh mipa inngur chher chher mai tur' tiin boxing glove an bun sup sup mai.

18th U 21 National Football Championship for Dutta Ray Trophy-ah Mizoram chuan Pubjab Goal 3-2 in a hneh lo

Final hun tur thaw dep depin kan thlir a, hlauh ang ngei ngeiin Mizoram chuan Pubjab chu an hneh ta lo. Hun a tawp a 3-2 a ni.

First Half chhung zawngin Mizoram chuan an nawr a, Goal chance pawh vawi engemawzat an hmu a, mahse an thun thei lo. Tin, Pubjab defence chu an khawng ve tlat bawk. Pubjab lam hian an lenna chu chhawrin an pawng nek nasa hle. First Half chu Goal inpe lo-in an hmang liam ta der mai.

Second Half an tan chiah a, C.Zothansangan Goal a khung ta. Mahse chu chu minute hnih hnu lekah Pubjab lamin an rawn chhanglet ve leh nghal a, 1-1 a ni. A hnu lawkah Mizoram lamin Goal an khung leh ta, a pet goal tu chu T.C. Lalhuapzauva a ni. Mahse, Minute 60 leh 63-ah Pubjab lam chuan goal an rawn khung thawt mai.

18th U 21 National Football Championship for Dutta Ray Trophy-ah Mizoram Final lut ta

18th U 21 National Football Championship for Dutta Ray Trophy semi final hmasa zawkah Mizoram leh Haryana Inkhelin, Mizoram chuan 3-1 in hnehna an chang a, final an lut ta. Naktuka West bengal leh Pubjab inkhelah a chak zawk zawk chu Mizoram nen final an khel dawn a ni.

Mizoram hian a tirte atangin inkhel an thunun nghal a, kawng engkimah chungnung zawkin First half Minute 37-ah Christopher Lalthlamuanan a goal khatna a khunga, mahse goal dang erawh an pe hlei thei chuang lo.  First half a zo a, Mizoram chuan 1-0 in hma an la hruai rih.

Second Half an tan a, Haryana lam chuan theihtawpa an tan lak nghalna rah chu sengin Min 49-ah goal an rawn khung ve leh ta. Mizoram lam hian han nawr viau thin mahse, goal an thun thei bik mai lo a. 1-1 in hun a tawp ta der mai. Extra time khelh tir an ni a.  Mizoram chuan an chungnung zawkna lantirin Zodinliana chuan min 7-ah a pet goal a, a hnu lawkah Lalrinfelan a pet goal ve leh bawk.

Top flight-ah Leitan Giants RC FC

Niminah ADFA buatsaih First Division kai chho tur zawnna play off an khel zo a, Durtlang Leitan atanga football club hlun RC FC Leitan chu team pathum inkhelkual zingah an chungnung ta ber a, season tharah hian MFA hnuaa First Division club thar an ni ve dawn ta. VIP Tailors neitu RC Khumate nupa enkawl RC FC hi Durtlang atanga first division club hmasa ber an ni.

Mamit District Football Association (MDFA) Inthlang

Football-a Mamit district pum phuarkhawm tu “Mamit District Football Association (MDFA)” chuan (zirtawpni) khan Agriculture Conference Hall, Mamitah kum 2009 atanga 2011 thleng atan an hruaitu tur an thlang a, President-ah Acting President Pu Lalrammawia, EE, PHE, Mamit an thlang a, Hon.Secretary atan hun engemaw chen he hna lo chelh tawhtu leh la ni mek Pu HK Vanlalhruaia, Lecturer, mamit College an thlang bawk.

Mizoram chu 18th U 21 National Football Championship for Dutta Ray Trophy -ah GROUP A hmahruaitu a ni

Vawiin chawhma lama inkhelah Mizoram chuan Semi Final an luh hnuah Group A hmahruaitu niturin Assam chu 3-0 in an hneh leh pek a.

Mizoram hian point awm zawng zawng huiin Group A hmahruaitu an ni chiang ta a.  Group A -ah hian West Bengal chuan Goa 3-0 veka hnehin Runners Up an ni a. Semi Final an rawn lut ve ta chiah bawk.

Vawiin inkhelah hian Mizoram tan Min 18-ah C Lalthlamuanan a pet goal a , Hun tawp dawn ruai min 87-ah David Lalrinmuanaan thun ve lehin, minute 88-ah Zodinlianan a thun zui ve nghal zat bawk.

Go Mizoram Team

Under 21 For Dutta Ray Trophy-ah Goa chu 3-1 a hnehin Mizoram-in Semi final an lut ta

Mizoram chuan Goa chu 3-1-a hnehin Under 21 For Dutta Ray Trophy khelh mekah Group-1 atangin Semi final an lut chiang ta a.  Mizoram tana goal khungtute hi Lalhuapzauva, H.Lalmalsawma leh Lalruatfela te an ni.