Sonia-i'n a pasal hming chawi Mualpuia Rajiv Ghandhi Stadium sakna tur lungphum a phum

 UPA Chairperson Sonia Ghandhi chuan, Inrinni khan a pasal Rajiv Ghandhi hming chawia Mualpuia Stadium sak mek lungphum a phum. Sonia chuan kum nga chhungin Mizoram tan cheng vaibelchhe 8,800 pek a nih dawn thu a sawi.

 Sonia Ghandhi chuan, 1986-a Rajiv Ghandhi nen Mizoram an tlawh atang khan, Rajiv khan Mizorama stadium sak a nih theihna turin theihtawp a chhuah thu leh, a hlawhtlinan an hmu tan ta chu lawmawm a tih thu a sawi.

 Stadium chu sak puitlin a nih hunah, India leh Mizoram ti hmingthatu chherchhuahna hmun a nih ngei a rin thu sawiin,"sak pawh in sak zawh thuai ka ring," a ti. Mizote'n infiamna lamah talent kan neih that thu a sawi a, Rajiv Ghandhi Stadium chuan infiamna lamah rahbi thar a kaitir a rin thu a sawi bawk.

 Sonia Ghandhi chuan sorkar laipuiin sum leh paia Mizoram a duhsak tur thu  sawiin,"Kum nga chhungin hmasawnna hna in thawh nan, cheng vaibelchhe 8,800 special grant kan pe ang che u," a ti a, Sorkar laipuiin Mizoram chu a ngaihthah loh tur thu a sawiin,"Sum leh paiah harsatna in tawk lo ang," a ti.

 Mizoram chu India rama state ralmuang ber zinga mi a nih vanga lawmthu sawiin Sonia Ghandhi chuan,"Hemi a tan hian in thawk nasa a, in vawn nung reng theih nan sorkar laipui chuan thawh ve a intiam a ni," a ti. Mizoramin remna leh muanna a neih theih nan a pasal Rajiv-a'n theihtawp a chhuah thu leh, Chief Minister Lal Thanhawla chu remna leh muanna a awm theih nana amah inhlan a nih thu a sawi bawk.

 Sonia Ghandhi chuan, sorkar laipui leh state-te manifesto chu tihhlawhtlin ngei tuma theihtawp chhuah a nih thu a sawi a,"Mipuiten an hlauthawng tur a ni lo, kan thu intiamte hi tih hlawhtling ngei kan tum a ni. NLUP pawh tihlawhtlin ngei kan tum," a ti. Mizoram mipuiten MLA, MP leh V/C inthlanah Congress an thlan  tlin avanga lawmthu a sawi rualin, sorkar tha leh langtlang siam chu sorkar bat a nih ve tawh thu a sawi.

 Sonia Ghandhi chuan project hrang hrangah Mizoram chu puih intiamin,"NIT, Sinik School,Polytechnic leh Project hrang hrangah kan pui ang che u," a ti. Education lama Mizoramin hmasawn tuma Education Reforms Commission a sin chu lawmawm a ti a, hemi kawngah hian sorkar laipui chuan an thlawp tlat thu a sawi bawk.

 Chief Minister Lal Thanhawla pawhin thu sawiin, kum 1986 a Rajiv Ghandhu-te chhungkua an lo kal  tum a Mizo thalaite'n,'World class infiammi kan neih theihna turin world class stadium min pe rawh,' tia an au chu Sonia Ghandhi-in ala hriat reng a rin thu a sawi a,"He project hi Rajiv Ghandhi chhanna leh kan thalaite awh em em tipuitlingtu tur a nih ngei ka beisei," a ti.

 Hawla chuan, Rajiv Ghandhi-a'n Mizorama remna leh muanna a thlen theihna tura a beih nasatzia sawiin, Mizo history-ah ropui takin chhinchhiah reng a ni tawh ang," a ti.

 Chief Minister chuan, kutdawh state nih reng kan duh tawh bik lo tiin,"Mahni intodelh hi kan duh ve tawh a, chumi atana harsatna sutkian tur la awmte kan sutkian theih nan leh, nakina tanpuitu kan nih zawk theih nan tunah hian min tanpui rawh u," tiin Sonia Ghandhi tanpuina a sil a ni. Mizoram MLA, MP leh V/C inthlana mipuiten Congress an thlan tlin avangin, an beisei ang ngeia hnathawh an tum thu a sawi bawk.

 Rajiv Ghandhi Stadium hi July 24,2009 khan Chief Minister Lal Thanhawla'n lei chekin hna bul an tan a; Lloyd Insulations(India) Ltd. Kolkata in a sak hna an thawk a, thawh khatna chu thla 18 chhunga zawh hman turin an ruahman a ni. Stadium chhungah hian Football field, mi 8 intlansiak theihna track bakah, mipui 19,760 thutna a awm ang. 

Mizoram House Endiktu Assembly Subject Committee - I Ten Cm Hnenah Report An Thehlut

Mizo Zirlai Te Zirna Senso Sorkar Laipuiin Tumsak Dawn

Da Impound Chungchanga Finance Department Thuchhuah

Hlawh Chungchanga Finance Department Thuchhuah

Doeacc In Press Mite Sawm

Assam Rifles Mizoram Range-in Golden Jubilee Lawm Dawn

World Guide Centenary Lawm

Saiha-ah Pykka Sport Neih Tan A Ni

Chief Minister Hovin State Level Bankers’ Committee Nei

Thupek